මිනිස්කම කෝ මිනිසුනේ

ලොවකි අරුමැති වෙසෙන මිනිසුන් උගත් නැණවත් ඒලොවේ
සමාජය හරි දියුණුයිලු අද ඇතිලු ජයගෙන සක්වලේ
දියුණු වෙන්නට හීන පුරමින් දුවති ෆැන්ටසි ලෝකයේ
මොහොතකට නැවතී බලන් අද මිනිස්කම කෝ මිනිසුනේ

කුරිරු මැරකම් පිරුණු වංචා ලොවක රජයයි භීෂණේ
වෛර ඊර්ෂ්‍යා පිරී සිත්තුළ කරුණාව කිම නොදැනුනේ
දරා ආයුධ උනුන් නසමින් නගයි ජයගොස දියුණුවේ
අනුන් පරදා ගෙනෙන සැපතක් දෙයිද සැනසුම ජීවිතේ

මහළු මව්පියො තනිව වැළපෙයි පාළු වැඩිහිටි නිවාසේ
දරා දසමස වැදූ දරුවන් අතරමං වී කුණුගොඩේ
මරා ගන්නේ මායිමට වැට සොහොයුරන් එක අම්මගේ
එදා ආලෙන් වෙලී සුරැකුණු පවුල් කෝ අද දෙවියනේ

රුවට පෙනුමට මුලාවී ප්‍රේමය සොයාගොස් රාගයේ
කාමරේ තුළ පහස සොයමින් කාසියට විකුණයි රුවේ
කාමයට නම් අත වනයි උන් තුන් හිතක නෑ ස්නේහයේ
බැඳීමක අරුතක් නොදන්නේ ඉතින් කෝ අද ආදරේ

මිනිස්කම නැති ලොවක් තුළ අප වෙළී ඇත අද ගනඳුරේ
දරා වල්මත් සිත් සතන් සැම දුවයි හැල්මේ රිසිලෙසේ
අධර්මය රජයන ලොවක් තුළ නොමැත සරණක් කිසිලෙසේ
එලොව නිවනට වඩිනු මැන යළි දෙවියනේ බුදු සමිඳුනේ

Co- director, Special Events : Rtr. Mihiravi Gunasekara